Tilboð til ung (13-17 ár)

Ung í aldrinum 13-17 ár kunnu luttaka í tannáringabólki. Í bólkinum eru tey saman við øðrum, sum eisini eiga foreldur ella systkin við rústrupulleikum.

Tekning: Katarine Quorning

Bólkarnir verða býttir soleiðis, at luttakararnir eru so javnir í aldri sum gjørligt. Dentur verður lagdur á eina javnvág millum hugna og at tosa um tað trupla. Hetta er eitt skipað tilboð, har eisini verður tosað opið um tað sum rørir seg hjá luttakararunum.

Umframt bólkatilboðið veita vit einstaklingasamrøður og familjusamrøður eftir tørvi. Teir tannáringar, sum ikki ynskja at vera við í bólki, kunnu eisini fáa hjálp á tann hátt.

Áðrenn eg byrjaði í bólkinum, krógvaði eg fyri øllum, hvussu eg hevði tað og tosaði ikki við nakran um tað. Nú tosi eg við hini í bólkinum og við mammu. Tað hjálpir. Nú eri eg ikki illur alla tíðina longur.

– Drongur, 14 ár

Pápi mín byrjaði at drekka, tá ið eg var fødd. Eg havi tí altíð følt at tað er mín skyld, at hann drekkur. Tá ið eg byrjaði í bólkinum, fann eg útav, at tað er ikki mín skyld.

– Genta, 15 ár

Eg hugsi so nógv samanborið við mínar vinir. Havi altíð verið meira ábyrgdarfull enn tey. Meira vaksin. Tað eri eg eisini noydd til at vera.

– Genta, 16 ár

Tilboðini hjá Øll hava rætt til góð barnaár

Øll tilboðini hjá Øll hava rætt til góð barnaár eru ókeypis. Tað krevst eingin ávísing (t.d. frá lækna), fyri at luttaka í tilboðnum. Einki krav er um, at tann við rústrupulleikum skal hava verið í viðgerð. Hevur viðkomandi verið í viðgerð, er einki krav um, hvar viðgerðin skal vera farin fram.

Tilboðið er fyri allar familjur, sum hava – ella hava havt – rústrupulleikar heima. Hetta merkir til dømis, at ein kann eisini melda seg til, hóast foreldrið t.d. ikki hevur rúsað seg í longri tíð. Nógv uppliva, at rústrupulleikin er burtur, men at avleiðingarnar og tann neiliga ávirkanin á familjuna og tey sjálv sita eftir.